أول يوم في الجيم

السلام عليكم و رحمه الله و بركاته

المره دي حنفترض أنك أول يوم تروح الجيم هو النهارده

طبعا أنت داخل مش عارف أي حاجه خالص و مش عارف حتخش إيه و لا حيحصل معاك إيه بالظبط و حتشيل إيه و تعمل إيه ؟؟

النهارده بما أن أول يوم فحب أقولك أن أول 3 أيام من التمرين بتبقي عندك حاجه إسمها General

و جنرال (خلينا بالعربي بقي ده النبي عربي مش حقعد أغير اللغه كل شويه) يعني عام ,, يعني حتلف علي كل جسمك في اليوم ده .

أنت ممكن ما تدخلش جنرال بس اﻷحسن أنك تدخل جنرال .

حتدخل علي كله بما فيهم الرجل بالرغم من أن في ناس بتكنسل الرجل ده .. بس أنت أدخله و ما تعملش زيهم

أوزانك حتبقي خفيفه جدا و متتكسفش . كل اللي في الجيم حيشوفك و أنت بتتمرن حيبقي عارف أنك لسه جديد و عارف أنك مش حتخش عليهم تقرقش المكن و البارات

كل المكن حتشخشه , مفيش بارات غير بارات البنش بس و مفيش دمبلز خالص برضو غير حاجات عبيطه كده

سؤالات بتطرح نفسها : إيه هو البار و إيه الدمبل و إيه المكن و إيه البنش و إيه الليله دي كلها؟؟

البار : هو ذلك العصايه الحديد التي يوضع به الوزن ((لغتي الفصحي جميله جميله جميله))

الدمبل : و هو ذلك الشئ الصغير الذي يمسك بقبضه اليد و يقام بتحريكه إلي أسفل و إلي أعلي ,, مع الصراخ بصوت عال.

المكن : هو مكنه تقوم بالجلوس علي الكرسي أو الوقوف أو أو أو و تسحب أو تدفع أو ترفع أو تنزل الوزن حسب العضله التي تقوم بتمرينها


و البنش هو أسم يطلق علي أحد عضلات الجسم و عضلات الجسم من أعلي إلي أسفل تسمي :

الكتف : الترابيس و الكتف
- الترابيس إيه الترجمه العربيه المحرفه لأسم العضله اللاتيني و هو ترابس Traps -أعتقد أني كتبتها صح - ((و لكن قام المصرين بجمعها و خلوها ترابيس)) و توجد هذه العضله ما بين عضله الكتف الموجوده أعلي الذراع و الرقبه
دوس علي الرابط لمشاهده الترابس:
http://www.criticalbench.com/exercises/pics/exercises-traps.gif
. أما عضله الكتف فهي تلك العضله المكوره أعلي الذراع في أخر الترابس
لمشاهده الكتف دوس علي الرابط:
http://www.criticalbench.com/exercises/pics/exercises-shoulders.gif


البنش : الصدر

- و البنش بيتكون من 3 أبعاد :
بعد رأسي و هو طول البنش من الرقبه في أتجاه البطن.
بعد أفقي و هو عرض البنش ما بين الذراعين .
و بعد من القفص الصدري إلي الخارج ((تخن العضله))
- و كل بعد و له تمرين .

الباي و التراي و الساعد و المطرقه و الرست : ذراع .

- يتكون الذراع من باي و تراي و ساعد و مطرقه و رست

الباي : هو الإختصار المصري للكلمه اللاتينيه Biceps و هي لها معني في اللغه اللاتينيه علي ما أعتقد Bi المزدوج ﻷن العضله بتتكون من جزئين جزء داخلي ناحيه البنش و جزء خارجي .
الرابط عشان تشوف العضله كويس:
http://www.criticalbench.com/exercises/pics/exercises-biceps.gif

التراي : و هو اﻹحتصار المصري أيضا للكلمه اللاتينيه Triceps و علي ما أعتقد أيضا Tri تعني الثلاثي ﻷن العضله بتتكون من 3 أجزاء

أدي الرابط عشان تشوف الصوره :
http://www.criticalbench.com/exercises/pics/exercises-biceps.gif

الساعد : هو العضله الخارجيه للنصف السفلي من الذراع .

الرست : هو العضله الداخليه للنصف السفلي من الذراع .

المطرقه : هي الزاويه القائمه ما بين النصف العلوي من الذراع ((باي و تراي)) و السفلي ((ساعد و رست)) و عشان تشوفها إعمل دراعك زاويه قائمه و ضمه ناحيه بطنك و شد عضلتك حتشوف الزاويه القايمه دي أسمها مطرقه .

االضهر : عضله الظهر :

و تنقسم عضله الظهر لـ 4 أقسام (( أنا ما أعرفش أساميهم كلهم الحقيقه )):

عضله القطنيه : و هي العضله اللي فوق المؤخره مباشرة , و بتبقي فوق الحوض علي طول

عضله الضهر الوسطي : و دي بتبقي حوالين العمود الفقري مباشرة.

عضله ضهر خارجيه : و هي العضله العريضه مابين الذراعين و بتاخد شكل مثلث دي من بره ,

المجانص: و هي العضله الداخليه تحت الذراعين .


البطن : و البطن بتنقسم لبطن علوي و بطن سفلي و جانبين.

الرجل : عضلات الرجل و بتنقسم عضلات الرجل :

لعضلات الفخذ : و دي بتبقي عضله فخذ أماميه و عضله فخذ خلفيه

و السمانه : و بتبقي سمانه داخليه و سمانه خارجيه



و كده أنت معاك كل عضلات جسمك و مناطق كل عضله .. عشان لو الكابتن قالك عندنا دراع تبقي عارف أنهي عضلات حتشتغل النهارده

البدايه

بسم الله الرحمن الرحيم

-من المتعارف عليه أن أغلبنا حاطط في دماغه جسم معين و نفسه يشوف نفسه فيه
-في واحد رفيع نفسه يشوف نفسه تخين متناسق
-و في تخين نفسه يشوف نفسه رفيع متناسق
-من اﻷخر كده التخين عايز يخس و الرفيع عايز يتخن ((الله الله أفدتنا يا شيخ و الله))
*و بعدين يقول أنا أروح الجيم .
و يروح الجيم

يفضل المدرب هناك يقوله: خش هنا علي المكنه دي 4 × 10 أو 3 ×15 و شيل البار و شيل الدمبل

و ينتع و شغال و عايش و يروح بيته مهدود و هو مش عارف هو أتمرن إيه ..
يوم و التاني و التالت و يبطل يروح ..
ليه؟؟
جاله إحباط و مش عارف هو بيتمرن إيه أو هو ماشي فين أو حيعمل إيه؟
من إيه؟
الناس هناك في دنيا تانيه و هو شكله وحش جدا .

- سيبك من الهجص اللي فوق ده أغبلنا بيحصل معاه و ركز في المفيد لو أنت عايز تجيب جسم صح .

عشان توصل لجسم مظبوط حتعتمد علي مجموعه حاجات و هي :
- نفسيتك.
- الصبر .
- النظام الغذائي .
- تمرينك .

ممكن تقابل حاجات تانيه بس هما دول اللي أنا شايفهم دلوقتي

1 - نفسيا psychologically :
----------------------------------------
-حاجه لازم تعرفها مهمه أوي و هي أن مفيش حد من اللي أنت شايفهم في الجيم دول أتولد بعضلاته أو بجسمه أو بيشيل اﻷوزان دي .
-في مقوله أنجليزيه أحفظها زي أسمك No Pain No Gain يعني مفيش تعب مفيش مكسب .
-في اﻷول لو أنت حتروح لواحدك يبقي أحسن عشان ساعات صاحبك بيفضل يتريق و يهزر و ممكن يحبطك و يعطلك عن التمرين و و و و و
-ساعات بيبقي مش كده .. فأنت تشوف صاحبك إيه ظروفه و علي الأساس ده حدد أنت تروح لواحدك ولا مع صاحبك.
-إوعي تتكسف أنك تشيل البار فاضي أو أوزانك تبقي خفيفه أوي و الناس كلها بتشيل أوزان بسم الله ماشاء الله و أنت ياعين كتكوت بالنسبه ليهم .
حط في دماغك دايما أن مفيش حد من الكباتن الكبار حيبصلك علي أنك المفروض تمشي من هنا .. محدش بيبص البصه دي .. و حتي لو لقيت حد بص كده ((أفتكر دايما أنك يكون شكلك وحش لفتره معينه بسيطه أحسن من أنك تكون عايش طول عمرك شكلك وحش))
-و لما تتمرن حدد أنت عايز إيه بالظبط عايز تبقي ضخم زي روني كولمان ؟؟ ولا تبقي خفيف زي أي موديل ؟؟ ولا أهو أخس و خلاص بس ما أبقاش بالجسم ده ولا أهو أتخن و خلاص بس ما أبقاش رفيع كده .. و غمض عينك و شوف نفسك باللي أنت عايزه .. و خد نفس و قول: " ده أنا . و أنا حكون كده . و محدش حيوقفني . و حوري الناس كلها أنا حعمل إيه".

2 - الصبر Patience:
--------------------------------

- فاكر No Pain No Gain ؟ لازم تتعب و لازم تصبر و لازم تحاول و لازم يكون عندك عزيمه عشان تتغير لأن يكون عندك جسم .
- مش حتتغير من يوم و ليله ((إلا إذا كنت أتمرنت قبل كده في رياضه معينه و جسمك بيتغير و بيشد بسرعه و دي حالات نادره إلي حد ما ))
- أغلب الناس الضخمه دي و الناس المظبوطه دي أقل واحد فيهم علي اﻷقل لعب 6 شهور أو سنه .
- و لازم تعرف أنك مش رايح تعمل عمليه تخسيس أو أنك حتعمل حاجه سريعه كده تتخنك و مفعولها يخلص و تروح .. أنت حتتمرن زي ما أي حد بيتمرن في أي رياضه .. حتسيبها حتسيبك .. حتديها حتديك .


3 - النظام الغذائي Diet:
-----------------------------------

-النظام الغذائي بتاعك بيختلف حسب نوع جسمك و حسب فصيله دمك و دي حاجه الدكتور بيحددها .. لكن العام أنك لازم تاكل حاجات فيها بروتين و كاربوهيدرات و سكريات .
و حسب أنت عايز إيه ؟ عايز تخس ولا تتخن ؟ و لا إيه ظروفك بالظبط؟
بس اﻷفضل اﻷفضل اﻷفضل أن الدكتور هو اللي يحددلك حسب نوع جسمك و فصيله دمك .

4 - التمرين Training أوWork Out :
----------------------------------------------------------

-و أنت بتتمرن لازم تعرف أنت بتتمرن إيه و حتدخل النهارده إيه . حتدخل باي ولا تراي و لا ضهر ولا بنش ولا رجل ولا كتف ؟؟
و لازم تعرف أن مفيش حاجه إسمها أنا عايز ألعب بنش بس .. أو رجل بس أو مش عارف إيه بس..

-تخيل نفسك كده رفيع خالص و دراعاتك منفوخه أوي بشكل وحش جدا .. أو صدرك عالي و أبعاده التلاته مليانين و دراعاتك رفيعه .. أو تبقي عريض من فوق أوي و رجليك رفيعه ((زي الكارتون))

-جسمك كله لازم يشتغل عشان يبقي مظبوط و متناسق.

و كفايه عليك كده عشان عينيك :)

سلامو عليكو